karen hain nauha abas dekh dostan tanha

kareñ haiñ nauha abas dekh dostāñ tanhā

adam se aa.e the tanhā chale vahāñ tanhā

nasīm-e-sub.h hai lag chalne meñ har ek yahāñ

nikaliye ghar se na juuñ mehr mehrbāñ tanhā

kiyā hai shauq ne parvāna sham.a-e-aiman kā

talab meñ us kī huuñ shab-gard jāñ-fishāñ tanhā

nikaltī kaash na baize se andalīb apne

huī asīr-e-qafas bhī to aah yaañ tanhā

hameñ to aks bhī apnā nazar nahīñ aatā

vo tīra-baḳht haiñ ham zer-e-āsmāñ tanhā

ġhubār ho ke mirā gard-o-bād kis ke liye

phire hai dasht meñ har-sū davāñ-davāñ tanhā

vo apne saa.e ke hote hijāb kartā hai

ḳhat us ko dījiyo qāsid mile jahāñ tanhā

hameñ bhī zer-e-falak apnī jaan bhārī hai

habāb hī nahīñ hastī se sargirāñ tanhā

phireñ haiñ bāl-fishāñ bulbuloñ ke jhunD ke jhunD

bhalī lage hai kise sair-e-bostāñ tanhā

sabā mile kahīñ gar qāfila to kiijo ḳhabar

bhaTak-bhaTak koī ro.e hai kar fuġhāñ tanhā

nahīñ sharīk bure vaqt kā kisī ke koī

paḌā karāhe hai rātoñ ye nā-tavāñ tanhā

huā nasīb ye sahrā-e-bekasī ai vaa.e

falak ne lā mujhe vārid kiyā kahāñ tanhā

nikal gayā tire hāthoñ kahāñ hai yaañ 'fidvī'

vo hovegā kisī jangal meñ ḳhasta-jāñ tanhā

karen hain nauha abas dekh dostan tanha

adam se aae the tanha chale wahan tanha

nasim-e-subh hai lag chalne mein har ek yahan

nikaliye ghar se na jun mehr mehrban tanha

kiya hai shauq ne parwana shama-e-aiman ka

talab mein us ki hun shab-gard jaan-fishan tanha

nikalti kash na baize se andalib apne

hui asir-e-qafas bhi to aah yan tanha

hamein to aks bhi apna nazar nahin aata

wo tira-baKHt hain hum zer-e-asman tanha

ghubar ho ke mera gard-o-baad kis ke liye

phire hai dasht mein har-su dawan-dawan tanha

wo apne sae ke hote hijab karta hai

KHat us ko dijiyo qasid mile jahan tanha

hamein bhi zer-e-falak apni jaan bhaari hai

habab hi nahin hasti se sargiran tanha

phiren hain baal-fishan bulbulon ke jhunD ke jhunD

bhali lage hai kise sair-e-bostan tanha

saba mile kahin gar qafila to kijo KHabar

bhaTak-bhaTak koi roe hai kar fughan tanha

nahin sharik bure waqt ka kisi ke koi

paDa karahe hai raaton ye na-tawan tanha

hua nasib ye sahra-e-bekasi ai wae

falak ne la mujhe warid kiya kahan tanha

nikal gaya tere hathon kahan hai yan 'fidwi'

wo howega kisi jangal mein KHasta-jaan tanha