karenge shikwa-e-jaur-o-jafa dil khol kar apna

kareñge shikva-e-jaur-o-jafā dil khol kar apnā

ki ye maidān-e-mahshar hai na ghar un kā na ghar apnā

makāñ dekhā kiye muḌ muḌ ke tā-hadd-e-nazar apnā

jo bas chaltā to le aate qafas meñ ghar kā ghar apnā

bahe jab aañkh se aañsū baḌhā soz-e-jigar apnā

hamesha meñh baraste meñ jalā kartā hai ghar apnā

pasīna ashk hasrat be-qarārī āḳhirī hichkī

ikaTThā kar rahā huuñ aaj sāmān-e-safar apnā

ye shab kā ḳhvāb yā-rab fasl-e-gul meñ sach na ho jaa.e

qafas ke sāmne jalte hue dekhā hai ghar apnā

dam-e-āḳhir ilāj-e-soz-e-ġham kahne kī bāteñ haiñ

mirā rasta na rokeñ rāsta leñ chāra-gar apnā

nishānāt-e-jabīñ josh-e-aqīdat ḳhud batā deñge

na pūchho mujh se sajde jā ke dekho sañg-e-dar apnā

javāb-e-ḳhat kā un ke sāmne kab hosh rahtā hai

batāte haiñ patā mere bajā.e nāma-bar apnā

mujhe ai qabr duniyā chain se rahne nahīñ detī

chalā aayā huuñ itnī baat par ghar chhoḌ kar apnā

shikan-ālūd bistar har shikan par ḳhuun ke dhabbe

ye hāl-e-shām-e-ġham likkhā hai ham ne tā-sahar apnā

yahī tīr-e-nazar to haiñ mire dil meñ hasīnoñ ke

jo pahchāno to lo pahchān lo tīr-e-nazar apnā

'qamar' un ko na aanā thā na aa.e sub.h hone tak

shab-e-va.ada sajāte hī rahe ghar raat bhar apnā

zamīñ mujh se munavvar āsmāñ raushan mire dam se

ḳhudā ke fazl se donoñ jagah qabza 'qamar' apnā

karenge shikwa-e-jaur-o-jafa dil khol kar apna

ki ye maidan-e-mahshar hai na ghar un ka na ghar apna

makan dekha kiye muD muD ke ta-hadd-e-nazar apna

jo bas chalta to le aate qafas mein ghar ka ghar apna

bahe jab aankh se aansu baDha soz-e-jigar apna

hamesha meinh baraste mein jala karta hai ghar apna

pasina ashk hasrat be-qarari aaKHiri hichki

ikaTTha kar raha hun aaj saman-e-safar apna

ye shab ka KHwab ya-rab fasl-e-gul mein sach na ho jae

qafas ke samne jalte hue dekha hai ghar apna

dam-e-aKHir ilaj-e-soz-e-gham kahne ki baaten hain

mera rasta na roken rasta len chaara-gar apna

nishanat-e-jabin josh-e-aqidat KHud bata denge

na puchho mujh se sajde ja ke dekho sang-e-dar apna

jawab-e-KHat ka un ke samne kab hosh rahta hai

batate hain pata mere bajae nama-bar apna

mujhe ai qabr duniya chain se rahne nahin deti

chala aaya hun itni baat par ghar chhoD kar apna

shikan-alud bistar har shikan par KHun ke dhabbe

ye haal-e-sham-e-gham likkha hai hum ne ta-sahar apna

yahi tir-e-nazar to hain mere dil mein hasinon ke

jo pahchano to lo pahchan lo tir-e-nazar apna

'qamar' un ko na aana tha na aae subh hone tak

shab-e-wada sajate hi rahe ghar raat bhar apna

zamin mujh se munawwar aasman raushan mere dam se

KHuda ke fazl se donon jagah qabza 'qamar' apna