karni hai rah-e-zist jo hamwar dosto

karnī hai rāh-e-zīst jo hamvār dosto

kyuuñ DhūñDte ho sāya-e-dīvār dosto

arzāñ kuchh itnī ho ga.ī jins-e-vafā ki ab

miltā nahīñ hai koī ḳharīdār dosto

muddat huī matā-e-dil-o-jāñ luTe hue

ab bhī vahī hai garmī-e-bāzār dosto

ḳhūn-e-jigar se likhte chalo naqsh-e-pā ke saath

kyā kah rahī hai vaqt kī raftār dosto

'nashtar' batā.e hāl-e-chaman kyā ki in dinoñ

har zaḳhm-e-dil hai hāsil-e-gulzār dosto

karni hai rah-e-zist jo hamwar dosto

kyun DhunDte ho saya-e-diwar dosto

arzan kuchh itni ho gai jins-e-wafa ki ab

milta nahin hai koi KHaridar dosto

muddat hui mata-e-dil-o-jaan luTe hue

ab bhi wahi hai garmi-e-bazar dosto

KHun-e-jigar se likhte chalo naqsh-e-pa ke sath

kya kah rahi hai waqt ki raftar dosto

'nashtar' batae haal-e-chaman kya ki in dinon

har zaKHm-e-dil hai hasil-e-gulzar dosto