karo ab KHatm ye qissa na tu meri na main tera

karo ab ḳhatm ye qissa na tū merī na maiñ terā

haTāo roz kā jhagḌā na tū merī na maiñ terā

ye duniyā Thiik kahtī hai mohabbat āfat-e-jāñ hai

to bas ab faisla pakkā na tū merī na maiñ terā

ye achchhā pyaar hai dushnām hai ta.ane haiñ shikve haiñ

arī zālim maiñ baaz aayā na tū merī na maiñ terā

ye chaḳh chaḳh roz kī apnī isī sūrat meñ chūTegī

na rakkheñ koī bhī rishta na tū merī na maiñ terā

alag se maiñ huā rusvā na kī tū ne koī parvā

yahī qismat meñ likkhā thā na tū merī na maiñ terā

bil-āḳhir tang aa kar kah diyā aaj us se 'gīlānī'

tujhe chāhā maiñ pāgal thā na tū merī na maiñ terā

karo ab KHatm ye qissa na tu meri na main tera

haTao roz ka jhagDa na tu meri na main tera

ye duniya Thik kahti hai mohabbat aafat-e-jaan hai

to bas ab faisla pakka na tu meri na main tera

ye achchha pyar hai dushnam hai tane hain shikwe hain

ari zalim main baz aaya na tu meri na main tera

ye chaKH chaKH roz ki apni isi surat mein chuTegi

na rakkhen koi bhi rishta na tu meri na main tera

alag se main hua ruswa na ki tu ne koi parwa

yahi qismat mein likkha tha na tu meri na main tera

bil-aKHir tang aa kar kah diya aaj us se 'gilani'

tujhe chaha main pagal tha na tu meri na main tera