karo bhi baat na mujhse udas logon ki

karo bhī baat na mujh se udaas logoñ kī

mujhe Darātī hai āñkhoñ meñ yaas logoñ kī

kisī ke lahje kī talḳhī kisī kī sard nazar

hai jam.a dil meñ mire ye asaas logoñ kī

chalā na ḳhāroñ pe kuchh bas to gul masal Daale

nikal rahī hai ab aise bhaḌās logoñ kī

mire janāze ko bas chaar log kaafī haiñ

kisī ko hogī zarūrat pachās logoñ kī

nazar haTī hī nahīñ apne aks se un kī

ajiib baat hai ye ḳhush-libās logoñ kī

nikal hī aatā hai ho kar ġhurūb phir sūraj

tabhī to mar nahīñ paatī hai aas logoñ kī

samajh meñ aa ga.ī duniyā bhī zindagī bhī 'hinā'

nigāh jab se milī ġham-shanās logoñ kī

karo bhi baat na mujh se udas logon ki

mujhe Daraati hai aankhon mein yas logon ki

kisi ke lahje ki talKHi kisi ki sard nazar

hai jama dil mein mere ye asas logon ki

chala na KHaron pe kuchh bas to gul masal Dale

nikal rahi hai ab aise bhaDas logon ki

mere janaze ko bas chaar log kafi hain

kisi ko hogi zarurat pachas logon ki

nazar haTi hi nahin apne aks se un ki

ajib baat hai ye KHush-libas logon ki

nikal hi aata hai ho kar ghurub phir suraj

tabhi to mar nahin pati hai aas logon ki

samajh mein aa gai duniya bhi zindagi bhi 'hina'

nigah jab se mili gham-shanas logon ki