karun tujhse bewafai ye kabhi rawa nahin tha

karūñ tujh se bevafā.ī ye kabhī ravā nahīñ thā

use bevafā na kahnā ki vo bevafā nahīñ thā

ye kisī kī sāzisheñ thiiñ yā thī marzī-e-zamāna

mirā tujh se duur honā mirā faisla nahīñ thā

kahīñ duur aa ga.ī thī maiñ hudūd-e-zindagī se

mire paas vāpsī kā koī rāsta nahīñ thā

mirī hālat-e-zubūñ se thā har ek shaḳhs vāqif

maiñ ye kaise maan jā.ūñ ki tujhe patā nahīñ thā

rahī saath zindagī ke maiñ kuchh aise zindagī bhar

kyā faqat tirā ḳhudā thā kyā mirā ḳhudā nahīñ thā

use bhūlne kī 'ḳhanda' kī hazār baar koshish

use bhūlne kā lekin mujhe hausla nahīñ thā

karun tujh se bewafai ye kabhi rawa nahin tha

use bewafa na kahna ki wo bewafa nahin tha

ye kisi ki sazishen thin ya thi marzi-e-zamana

mera tujh se dur hona mera faisla nahin tha

kahin dur aa gai thi main hudud-e-zindagi se

mere pas wapsi ka koi rasta nahin tha

meri haalat-e-zubun se tha har ek shaKHs waqif

main ye kaise man jaun ki tujhe pata nahin tha

rahi sath zindagi ke main kuchh aise zindagi bhar

kya faqat tera KHuda tha kya mera KHuda nahin tha

use bhulne ki 'KHanda' ki hazar bar koshish

use bhulne ka lekin mujhe hausla nahin tha