karwaTen lene do farsh-e-KHak par naKHchir ko

karvaTeñ lene do farsh-e-ḳhāk par naḳhchīr ko

be-dhaḌak ho kar nikālo tum jigar se tiir ko

vasl kī lazzat uThāne dījiye naḳhchīr ko

tiir se dil ko na dil se duur kiije tiir ko

ye hamārā hai jigar ye hai hamārā hausla

ḳhūn-e-dil se pālte haiñ ham tumhāre tiir ko

jalva-farmā dil meñ tum bhī ho tumhārī yaad bhī

dekh lo pahle kaleja phir lagānā tiir ko

ho gayā nāvak ḳhatā hai sharm se nīchī nazar

laao ham rakh leñ kaleje meñ tumhāre tiir ko

aa ke lipTā hai mire siine se kis ulfat ke saath

tum se baḌh kar bā-vafā paayā tumhāre tiir ko

chuum kar aaya hai ye dast-e-hinā.ī aap kā

kyoñ na rakkhūñ maiñ kaleje se lagā kar tiir ko

zindagī bhar ko ḳhalish kā lutf paidā kar diyā

tum hī bolo kyā du'ā.eñ duuñ tumhāre tiir ko

surḳh ho jaa.eñ na fart-e-nāzukī se uñgliyāñ

kyoñ nikālo dil se tum rahne do dil meñ tiir ko

kyā 'ajab ghul-mil gayā ho hasrat-o-armāñ ke saath

DhūñD lo tum ḳhud hī aa kar dil meñ apne tiir ko

dil ko taakā hai to behtar hai magar apnī tarah

chuTkiyāñ lene kī 'ādat to sikhā do tiir ko

dil to dil pahlū bhī chedā chhed kar merā jigar

kyoñ na paiġhām-e-ajal samjhūñ tumhāre tiir ko

karwaTen lene do farsh-e-KHak par naKHchir ko

be-dhaDak ho kar nikalo tum jigar se tir ko

wasl ki lazzat uThane dijiye naKHchir ko

tir se dil ko na dil se dur kije tir ko

ye hamara hai jigar ye hai hamara hausla

KHun-e-dil se palte hain hum tumhaare tir ko

jalwa-farma dil mein tum bhi ho tumhaari yaad bhi

dekh lo pahle kaleja phir lagana tir ko

ho gaya nawak KHata hai sharm se nichi nazar

lao hum rakh len kaleje mein tumhaare tir ko

aa ke lipTa hai mere sine se kis ulfat ke sath

tum se baDh kar ba-wafa paya tumhaare tir ko

chum kar aaya hai ye dast-e-hinai aap ka

kyon na rakkhun main kaleje se laga kar tir ko

zindagi bhar ko KHalish ka lutf paida kar diya

tum hi bolo kya du'aen dun tumhaare tir ko

surKH ho jaen na fart-e-nazuki se ungliyan

kyon nikalo dil se tum rahne do dil mein tir ko

kya 'ajab ghul-mil gaya ho hasrat-o-arman ke sath

DhunD lo tum KHud hi aa kar dil mein apne tir ko

dil ko taka hai to behtar hai magar apni tarah

chuTkiyan lene ki 'adat to sikha do tir ko

dil to dil pahlu bhi cheda chhed kar mera jigar

kyon na paigham-e-ajal samjhun tumhaare tir ko