kashtiyon ke khilkhilate baadbanon ki tarah

kashtiyoñ ke khilkhilāte bādbānoñ kī tarah

raat bhar ugte haiñ chehre gum ḳhazānoñ kī tarah

ho na hir-phir sair-e-gul ko jā rahī hai fāḳhta

phir havā chalne lagī hai naujavānoñ kī tarah

bārhā jo mujh se Takrātī hai merī guuñj hai

maiñ bhī ḳhush-ābād huuñ ḳhālī makānoñ kī tarah

jam.a hai kuuze sā mujh meñ umr bhar kā shor-o-ġhul

lag rahe haiñ zehn-o-dil naqqār-ḳhānoñ kī tarah

mujh ko siipī sā Dhake rahtā hai miTTī par falak

hashr meñ niklūñ kahīñ motī ke dānoñ kī tarah

za.afrān-e-fan banegā virsa-e-urdu mirā

maiñ ne bhī alfāz bo.e haiñ kisānoñ kī tarah

kashtiyon ke khilkhilate baadbanon ki tarah

raat bhar ugte hain chehre gum KHazanon ki tarah

ho na hir-phir sair-e-gul ko ja rahi hai faKHta

phir hawa chalne lagi hai naujawanon ki tarah

barha jo mujh se Takraati hai meri gunj hai

main bhi KHush-abaad hun KHali makanon ki tarah

jama hai kuze sa mujh mein umr bhar ka shor-o-ghul

lag rahe hain zehn-o-dil naqqar-KHanon ki tarah

mujh ko sipi sa Dhake rahta hai miTTi par falak

hashr mein niklun kahin moti ke danon ki tarah

zafran-e-fan banega wirsa-e-urdu mera

main ne bhi alfaz boe hain kisanon ki tarah