kaTi hai umr gunahgar-e-zindagi ki tarah

kaTī hai 'umr gunahgār-e-zindagī kī tarah

dayār-e-dost se guzre haiñ ajnabī kī tarah

baḌā karam hai ye mujh par ġham-e-mohabbat ka

ġham-e-hayāt bhī raas aa gayā ḳhushī kī tarah

tire sulūk pe mujh ko baḌā ta'ajjub hai

na dushmanī kī tarah hai na dostī kī tarah

vo ḳhvāb jin meñ tirā husn raqs-farmā thā

bikhar ga.e haiñ pareshān zindagī kī tarah

bahār aa ke ye kyā gul khilā ga.ī yārab

guloñ ke ruḳh pe hañsī hai fasurdagī kī tarah

charāġh jal to ga.e raushnī ka naam nahīñ

vo raushnī jo nazar aa.e raushnī kī tarah

vo duur rah ke bhī ab duur rah nahīñ sakte

ham un kī yaad se mānūs haiñ unhī kī tarah

qamar-jamāl kahūñ kyoñ na un ke jalvoñ ko

utar ga.e vo mire dil meñ chāñdnī kī tarah

kisī kī yād-e-bahār-āfrīñ ka kyā kahnā

khilī hai dil kī kalī vāqa'ī kalī kī tarah

kaTi hai 'umr gunahgar-e-zindagi ki tarah

dayar-e-dost se guzre hain ajnabi ki tarah

baDa karam hai ye mujh par gham-e-mohabbat ka

gham-e-hayat bhi ras aa gaya KHushi ki tarah

tere suluk pe mujh ko baDa ta'ajjub hai

na dushmani ki tarah hai na dosti ki tarah

wo KHwab jin mein tera husn raqs-farma tha

bikhar gae hain pareshan zindagi ki tarah

bahaar aa ke ye kya gul khila gai yarab

gulon ke ruKH pe hansi hai fasurdagi ki tarah

charagh jal to gae raushni ka nam nahin

wo raushni jo nazar aae raushni ki tarah

wo dur rah ke bhi ab dur rah nahin sakte

hum un ki yaad se manus hain unhi ki tarah

qamar-jamal kahun kyon na un ke jalwon ko

utar gae wo mere dil mein chandni ki tarah

kisi ki yaad-e-bahaar-afrin ka kya kahna

khili hai dil ki kali waqa'i kali ki tarah