kaun aaega jo tu be-sar-o-saman hoga

kaun aa.egā jo tū be-sar-o-sāmāñ hogā

varna hogā tū na andesha-e-darbāñ hogā

qatl ke ba.ad bhī ik aish kā sāmāñ hogā

mai-e-gul-rañg lahū zaḳhm namak-dāñ hogā

bāñkpan bas ki hai manzūr mire qātil ko

gul-e-dastār bhī ab ġhuncha-e-paikāñ hogā

ik nazar dekh sakegā na tirī chashm-e-siyāh

sabza-e-ḳhat bhī charāgāh-e-ġhazālāñ hogā

tū vahāñ bhī jo na ho yaar to phir hai andher

roz-e-mahshar pe gumān-e-shab-e-hijrāñ hogā

dilbaro dil ke na le jaane meñ isrār karo

tum ko kyā fā.eda hogā mirā nuqsāñ hogā

jaate haiñ sabr o qarār o ḳhirad o hosh o havās

jaras-e-qāfila apnā dil-e-nālāñ hogā

mere iisā se mire dard kā darmāñ hogā

sharbat-e-vasl ilāj-e-tap-e-hijrāñ hogā

vaa.iz ham ko tū na hañgāma-e-mahshar se Darā

apne nazdīk vo ik majma-e-yārāñ hogā

aa.ina dīda-e-hairāñ tujhe dikhlā.egā

shāna-e-zulf mirā hāl-e-pareshāñ hogā

dil-e-be-ishq se kaunain meñ tū hogā ḳharāb

barhaman dair meñ ka.abe meñ musalmāñ hogā

gar ye haiñ dast-e-junūñ aur vo haiñ ḳhār-e-junūñ

na to dāman hī rahegā na garebāñ hogā

shāḳh-e-gul hai qalam-e-fikr to ash.ār haiñ gul

'arsh' dīvān mirā rashk-e-gulistāñ hogā

kaun aaega jo tu be-sar-o-saman hoga

warna hoga tu na andesha-e-darban hoga

qatl ke baad bhi ek aish ka saman hoga

mai-e-gul-rang lahu zaKHm namak-dan hoga

bankpan bas ki hai manzur mere qatil ko

gul-e-dastar bhi ab ghuncha-e-paikan hoga

ek nazar dekh sakega na teri chashm-e-siyah

sabza-e-KHat bhi charagah-e-ghazalan hoga

tu wahan bhi jo na ho yar to phir hai andher

roz-e-mahshar pe guman-e-shab-e-hijran hoga

dilbaro dil ke na le jaane mein israr karo

tum ko kya faeda hoga mera nuqsan hoga

jate hain sabr o qarar o KHirad o hosh o hawas

jaras-e-qafila apna dil-e-nalan hoga

mere isa se mere dard ka darman hoga

sharbat-e-wasl ilaj-e-tap-e-hijran hoga

waiz hum ko tu na hangama-e-mahshar se Dara

apne nazdik wo ek majma-e-yaran hoga

aaina dida-e-hairan tujhe dikhlaega

shana-e-zulf mera haal-e-pareshan hoga

dil-e-be-ishq se kaunain mein tu hoga KHarab

barhaman dair mein kabe mein musalman hoga

gar ye hain dast-e-junun aur wo hain KHar-e-junun

na to daman hi rahega na gareban hoga

shaKH-e-gul hai qalam-e-fikr to ashaar hain gul

'arsh' diwan mera rashk-e-gulistan hoga