kaun aajiz sila-e-tishna-e-dahani mange

kaun 'ājiz' sila-e-tishna-e-dahānī māñge

ye jahāñ aag use detā hai jo paanī māñge

dil bhī gardan bhī hathelī pe liye phirtā huuñ

jaane kab kis kā lahū terī javānī māñge

toḌiye maslahat-e-vaqt kī dīvāroñ ko

raah jis vaqt tabī.at kī ravānī māñge

māñgnā jurm hai fankār se tartīb-e-ḳhayāl

gesū-e-vaqt jab āshufta-bayānī māñge

saaqī tū chāhe to vo daur bhī aa saktā hai

ki mile jām-e-sharāb us ko jo paanī māñge

kis kā siina hai jo zaḳhmoñ se nahīñ hai ma.amūr

kyā koī tujh se mohabbat kī nishānī māñge

dil to de hī chukā ab hai ye irāda apnā

jaan bhī de duuñ jo vo dushman-e-jānī māñge

haiñ mire shīsha-e-sahbā-e-suḳhan meñ donoñ

na.ī māñge koī mujh se ki purānī māñge

kaun 'ajiz' sila-e-tishna-e-dahani mange

ye jahan aag use deta hai jo pani mange

dil bhi gardan bhi hatheli pe liye phirta hun

jaane kab kis ka lahu teri jawani mange

toDiye maslahat-e-waqt ki diwaron ko

rah jis waqt tabiat ki rawani mange

mangna jurm hai fankar se tartib-e-KHayal

gesu-e-waqt jab aashufta-bayani mange

saqi tu chahe to wo daur bhi aa sakta hai

ki mile jam-e-sharab us ko jo pani mange

kis ka sina hai jo zaKHmon se nahin hai mamur

kya koi tujh se mohabbat ki nishani mange

dil to de hi chuka ab hai ye irada apna

jaan bhi de dun jo wo dushman-e-jaani mange

hain mere shisha-e-sahba-e-suKHan mein donon

nai mange koi mujh se ki purani mange