kaun chiKHa hai mere jism ke viranon mein

kaun chīḳhā hai mire jism ke vīrānoñ meñ

ek āvāz sī aa.ī hai mire kānoñ meñ

ye tirī sard nigāhī kā asar hai shāyad

dauḌtā phirtā lahū jam gayā shiryānoñ meñ

raushnī kā koī imkān huā hai raushan

ik sharāra koī lahrāyā siyah-ḳhānoñ meñ

mere chehre pe tire chehre ke milte haiñ subūt

ek pahchān hai tū bhī merī pahchānoñ meñ

ḳhushk āñkhoñ meñ abas DhūñD rahe ho aañsū

ye ḳhazāna hai mirī ruuh ke tah-ḳhānoñ meñ

mol miltā hai kyā is jins-e-girāñ kā dekheñ

saj ga.e ham bhī yahī soch ke dūkānoñ meñ

hai ta.ajjub ki charāġhoñ ko tarastā hai vahī

jis ne kal dhuup lagā.ī thī shabistānoñ meñ

varġhalātī rahī rangīnī-e-duniyā 'sālim'

ek halchal sī rahī umr-bhar īmānoñ meñ

kaun chiKHa hai mere jism ke viranon mein

ek aawaz si aai hai mere kanon mein

ye teri sard nigahi ka asar hai shayad

dauDta phirta lahu jam gaya shiryanon mein

raushni ka koi imkan hua hai raushan

ek sharara koi lahraya siyah-KHanon mein

mere chehre pe tere chehre ke milte hain subut

ek pahchan hai tu bhi meri pahchanon mein

KHushk aankhon mein abas DhunD rahe ho aansu

ye KHazana hai meri ruh ke tah-KHanon mein

mol milta hai kya is jins-e-giran ka dekhen

saj gae hum bhi yahi soch ke dukanon mein

hai tajjub ki charaghon ko tarasta hai wahi

jis ne kal dhup lagai thi shabistanon mein

warghalati rahi rangini-e-duniya 'salim'

ek halchal si rahi umr-bhar imanon mein