kaun hai tujhse jo do-chaar nahin

kaun hai tujh se jo do-chār nahīñ

ek maiñ hī gunāhgār nahīñ

haa.e fasl-e-bahār-e-josh-e-junūñ

yaañ garebāñ meñ ek taar nahīñ

saikḌoñ dard ik nahīñ darmāñ

laakh ġham koī ġham-gusār nahīñ

ham nahīñ vo jo ek bhī māneñ

aap karte raheñ hazār nahīñ

sab sahī gul bhī mai bhī mutrib bhī

tū nahīñ hai to kuchh bahār nahīñ

vasl kyā jab na hijr ke hoñ maze

vā'da kyā jis kā intizār nahīñ

ġhair se mil ke kyoñ nikālte ho

maiñ kudūrat kā kuchh ġhubār nahīñ

haath aa jaa.e aap kā dāman

hashr kā bhī kuchh intizār nahīñ

kyā sabāt-e-do-roza par mere

zindagī kā kuchh e'tibār nahīñ

saikḌoñ baar ġhair se bigḌī

maiñ to maiñ tum kisī ke yaar nahīñ

us ke kushtoñ kā kyā pata 'sho.ala'

kahīñ turbat nahīñ mazār nahīñ

kaun hai tujh se jo do-chaar nahin

ek main hi gunahgar nahin

hae fasl-e-bahaar-e-josh-e-junun

yan gareban mein ek tar nahin

saikDon dard ek nahin darman

lakh gham koi gham-gusar nahin

hum nahin wo jo ek bhi manen

aap karte rahen hazar nahin

sab sahi gul bhi mai bhi mutrib bhi

tu nahin hai to kuchh bahaar nahin

wasl kya jab na hijr ke hon maze

wa'da kya jis ka intizar nahin

ghair se mil ke kyon nikalte ho

main kudurat ka kuchh ghubar nahin

hath aa jae aap ka daman

hashr ka bhi kuchh intizar nahin

kya sabaat-e-do-roza par mere

zindagi ka kuchh e'tibar nahin

saikDon bar ghair se bigDi

main to main tum kisi ke yar nahin

us ke kushton ka kya pata 'shoala'

kahin turbat nahin mazar nahin