kaun jaane ki taKHayyul mein hain paikar kitne

kaun jaane ki taḳhayyul meñ haiñ paikar kitne

but tarāshegā abhī aur ye aazar kitne

ham ne ik qatre kā ehsān gavārā na kiyā

pī ga.e log ḳhudā jaane samundar kitne

yaad aate hī tirī aa.e ḳhayāloñ ke hujūm

ek paikar se tarāshe ga.e paikar kitne

ho vo maz.hab kā labāda ki siyāsat kā libās

log phirte haiñ yahāñ bhes badal kar kitne

shahr phūloñ kā jise ham ne samajh rakkhā thā

ham pe pheñke ga.e us shahr meñ patthar kitne

jo kuchh in āñkhoñ ne dekhā hai vahī kyā kam thā

aur dekheñge abhī dekhiye manzar kitne

ek saaqī ke na hone se hai māhaul udaas

aaj toḌe ga.e maiḳhāne meñ sāġhar kitne

bijliyāñ girtīñ chaman par to koī baat na thī

ātish-e-gul ne jalā.e haiñ yahāñ ghar kitne

dil vo qatra hai ki hastī nahīñ jis kī mahdūd

isī qatre meñ haiñ poshīda samundar kitne

ek tum hī nahīñ duniyā-e-adab meñ 'jauhar'

haiñ isī bahr meñ kyā jāniye gauhar kitne

kaun jaane ki taKHayyul mein hain paikar kitne

but tarashega abhi aur ye aazar kitne

hum ne ek qatre ka ehsan gawara na kiya

pi gae log KHuda jaane samundar kitne

yaad aate hi teri aae KHayalon ke hujum

ek paikar se tarashe gae paikar kitne

ho wo mazhab ka labaada ki siyasat ka libas

log phirte hain yahan bhes badal kar kitne

shahr phulon ka jise hum ne samajh rakkha tha

hum pe phenke gae us shahr mein patthar kitne

jo kuchh in aankhon ne dekha hai wahi kya kam tha

aur dekhenge abhi dekhiye manzar kitne

ek saqi ke na hone se hai mahaul udas

aaj toDe gae maiKHane mein saghar kitne

bijliyan girtin chaman par to koi baat na thi

aatish-e-gul ne jalae hain yahan ghar kitne

dil wo qatra hai ki hasti nahin jis ki mahdud

isi qatre mein hain poshida samundar kitne

ek tum hi nahin duniya-e-adab mein 'jauhar'

hain isi bahr mein kya jaaniye gauhar kitne