kaun kahta hai ki mahrum-e-karam hain hum log

kaun kahtā hai ki mahrūm-e-karam haiñ ham log

lutf-andoz-e-jafā mahv-e-sitam haiñ ham log

zulf suljhī hai to ik husn nikhar aayā hai

is taraf dekh ki ā.īna-e-ġham haiñ ham log

koī ḳhātir meñ na laa.e to na laa.e lekin

shāyad is daur-e-mohabbat meñ aham haiñ ham log

lā.eq-e-lutf-o-ināyat nahīñ ham ahl-e-vafā

kyā kahā ye ki sazā-vār-e-sitam haiñ ham log

kam nahīñ terā taġhāful bhī jafā ho ki na ho

is meñ kyā shak hai ki mamnūn-e-karam haiñ ham log

ahl-e-ka.aba ko shikāyat hai to bejā bhī nahīñ

ki haqīqat meñ parastār-e-sanam haiñ ham log

fāsla kuchh bhī nahīñ hai magar idrāk kahāñ

aap se duur to do-chār qadam haiñ ham log

aap allāma-o-fankār haiñ 'nudrat' lekin

ye to farmā.iye kis baat meñ kam haiñ ham log

kaun kahta hai ki mahrum-e-karam hain hum log

lutf-andoz-e-jafa mahw-e-sitam hain hum log

zulf suljhi hai to ek husn nikhar aaya hai

is taraf dekh ki aaina-e-gham hain hum log

koi KHatir mein na lae to na lae lekin

shayad is daur-e-mohabbat mein aham hain hum log

laeq-e-lutf-o-inayat nahin hum ahl-e-wafa

kya kaha ye ki saza-war-e-sitam hain hum log

kam nahin tera taghaful bhi jafa ho ki na ho

is mein kya shak hai ki mamnun-e-karam hain hum log

ahl-e-kaba ko shikayat hai to beja bhi nahin

ki haqiqat mein parastar-e-sanam hain hum log

fasla kuchh bhi nahin hai magar idrak kahan

aap se dur to do-chaar qadam hain hum log

aap allama-o-fankar hain 'nudrat' lekin

ye to farmaiye kis baat mein kam hain hum log