kaun kahta hai ki nafrat ko sada di jae

kaun kahtā hai kī nafrat ko sadā dī jaa.e

aao bas dil meñ vafā aur baḌhā dī jaa.e

ham-safar lutf-e-safar aur do-bālā hogā

chhāñv meñ dhuup agar thoḌī milā dī jaa.e

ab to vahshat mirī chāhat kī yahī kahtī hai

maiñ gunahgār huuñ to mujh ko sazā dī jaa.e

abr ḳhushiyoñ ke bhī barseñge yaqīñ hai mujh ko

ġham kī chādar to mire sar se haTā dī jaa.e

maiñ ne asrār aziyyat meñ hī khulte dekhe

baat chhoTī hai magar sab ko batā dī jaa.e

umr phir us kī asīrī meñ guzārūñ 'jyotī'

phir se mujh ko vahī āzād fazā dī jaa.e

kaun kahta hai ki nafrat ko sada di jae

aao bas dil mein wafa aur baDha di jae

ham-safar lutf-e-safar aur do-baala hoga

chhanw mein dhup agar thoDi mila di jae

ab to wahshat meri chahat ki yahi kahti hai

main gunahgar hun to mujh ko saza di jae

abr KHushiyon ke bhi barsenge yaqin hai mujh ko

gham ki chadar to mere sar se haTa di jae

main ne asrar aziyyat mein hi khulte dekhe

baat chhoTi hai magar sab ko bata di jae

umr phir us ki asiri mein guzarun 'jyoti'

phir se mujh ko wahi aazad faza di jae