kaun marta hai kise maut miTa deti hai

kaun martā hai kise maut miTā detī hai

niiñd aa jaatī hai jab umr thakā detī hai

sho.ala-e-jazb-e-mohabbat ko havā detī hai

be-ruḳhī aur bhī kuchh shauq baḌhā detī hai

ziist ke jehd-e-musalsal kā hai vaqfa ye maut

zindagī ko nayā kirdār fanā detī hai

terī har shoḳh nazar fitna-gar-e-ālam hai

terī har chaal qayāmat ko sadā detī hai

fasl-e-gul jaise mire ghar meñ chhupī ho ki ḳhizāñ

aa ke darvāze kī zanjīr hilā detī hai

har na.ī shaam jalāte haiñ umīdoñ ke diye

har na.ī sub.h unheñ aa ke bujhā detī hai

dil magan ho to safar dhuup meñ kaT jaatā hai

varna ye chhāñv bhī tan-man ko jalā detī hai

muntashir baal ye aañsū ye shikasta dāman

ḳhastagī ghar ke ujaḌne kā patā detī hai

tere chehre pe tafakkur kī jhalak ai 'shāriq'

tere andar kā chhupā raaz batā detī hai

kaun marta hai kise maut miTa deti hai

nind aa jati hai jab umr thaka deti hai

shoala-e-jazb-e-mohabbat ko hawa deti hai

be-ruKHi aur bhi kuchh shauq baDha deti hai

zist ke jehd-e-musalsal ka hai waqfa ye maut

zindagi ko naya kirdar fana deti hai

teri har shoKH nazar fitna-gar-e-alam hai

teri har chaal qayamat ko sada deti hai

fasl-e-gul jaise mere ghar mein chhupi ho ki KHizan

aa ke darwaze ki zanjir hila deti hai

har nai sham jalate hain umidon ke diye

har nai subh unhen aa ke bujha deti hai

dil magan ho to safar dhup mein kaT jata hai

warna ye chhanw bhi tan-man ko jala deti hai

muntashir baal ye aansu ye shikasta daman

KHastagi ghar ke ujaDne ka pata deti hai

tere chehre pe tafakkur ki jhalak ai 'shaariq'

tere andar ka chhupa raaz bata deti hai