kaun nikle ghar se bahar raat mein

kaun nikle ghar se bāhar raat meñ

so ga.e ham apne andar raat meñ

phir se milne aa ga.iiñ tanhā.iyāñ

kyoñ nahīñ khulte haiñ daftar raat meñ

ham juTā lete haiñ bistar to magar

roz kam paḌtī hai chādar raat meñ

roz hī vo ek laḌkī sub.h sī

jaatī hai ham ko jagā kar raat meñ

ḳhvāb dekhā hai isī kā raat bhar

so.e the jis ko bhulā kar raat meñ

zindagī bhar kī kamā.ī ek raat

jo milī ḳhud ko gañvā kar raat meñ

saañp do aate haiñ ham ko kāTne

us kī yādeñ aur ye ghar raat meñ

zindagī kī raat ik din ḳhatm ho

ye duā karte haiñ aksar raat meñ

kaun nikle ghar se bahar raat mein

so gae hum apne andar raat mein

phir se milne aa gain tanhaiyan

kyon nahin khulte hain daftar raat mein

hum juTa lete hain bistar to magar

roz kam paDti hai chadar raat mein

roz hi wo ek laDki subh si

jati hai hum ko jaga kar raat mein

KHwab dekha hai isi ka raat bhar

soe the jis ko bhula kar raat mein

zindagi bhar ki kamai ek raat

jo mili KHud ko ganwa kar raat mein

sanp do aate hain hum ko kaTne

us ki yaaden aur ye ghar raat mein

zindagi ki raat ek din KHatm ho

ye dua karte hain aksar raat mein