kaun sa ishq-e-butan mein hamein sadma na hua

kaun sā ishq-e-butāñ meñ hameñ sadma na huā

dard-e-furqat na huā ġham na huā kyā na huā

ġhair ne baat to kī baat to pūchhī merī

ḳhair se tum ko to itnā bhī salīqa na huā

mahv-e-hairat haiñ to donoñ haiñ tirī mahfil meñ

ham se pardā huā ā.īñe se pardā na huā

un kī ye ḳhūbī-e-aḳhlāq ki va.ada to kiyā

merī ye shomī-e-taqdīr ki iifā na huā

jazba-e-ishq se ham un ko bulā lete 'rasā'

ye bhī kambaḳht tabī.at ko gavārā na huā

kaun sa ishq-e-butan mein hamein sadma na hua

dard-e-furqat na hua gham na hua kya na hua

ghair ne baat to ki baat to puchhi meri

KHair se tum ko to itna bhi saliqa na hua

mahw-e-hairat hain to donon hain teri mahfil mein

hum se parda hua aaine se parda na hua

un ki ye KHubi-e-aKHlaq ki wada to kiya

meri ye shomi-e-taqdir ki ifa na hua

jazba-e-ishq se hum un ko bula lete 'rasa'

ye bhi kambaKHt tabiat ko gawara na hua