kaun se din teri yaad ai but-e-saffak nahin

kaun se din tirī yaad ai but-e-saffāk nahīñ

kaun sī shab hai ki ḳhanjar se jigar chaak nahīñ

lutf-e-qātil meñ ta.ammul nahīñ par kyā kiije

sar-e-shorīda mirā qābil-e-fitrāk nahīñ

tujh par ai dilbar-e-ālam jo har ik martā hai

is liye marne se mere koī ġhamnāk nahīñ

dil huā paak to phir kaun nazar kartā hai

aur dil paak nahīñ hai to nazar paak nahīñ

ilm aur jahl meñ kuchh farq na ho kyā ma.anī

ham bhī bebāk haiñ par ġhair se bebāk nahīñ

qais ko fazl-e-taqaddum hai vagarna yaañ kyā

sar-e-shorīda nahīñ yā jigar-e-chāk nahīñ

mā-sivā allāh na rahe 'sheftā' hargiz dil meñ

khusravī kaaḳh sazā-e-ḳhas-o-ḳhāshāk nahīñ

kaun se din teri yaad ai but-e-saffak nahin

kaun si shab hai ki KHanjar se jigar chaak nahin

lutf-e-qatil mein tammul nahin par kya kije

sar-e-shorida mera qabil-e-fitrak nahin

tujh par ai dilbar-e-alam jo har ek marta hai

is liye marne se mere koi ghamnak nahin

dil hua pak to phir kaun nazar karta hai

aur dil pak nahin hai to nazar pak nahin

ilm aur jahl mein kuchh farq na ho kya mani

hum bhi bebak hain par ghair se bebak nahin

qais ko fazl-e-taqaddum hai wagarna yan kya

sar-e-shorida nahin ya jigar-e-chaak nahin

ma-siwa allah na rahe 'shefta' hargiz dil mein

khusrawi kaKH saza-e-KHas-o-KHashak nahin