kaun se shahr mein kis ghar mein kahan hona hai

kaun se shahr meñ kis ghar meñ kahāñ honā hai

maiñ vahāñ hotā nahīñ mujh ko jahāñ honā hai

ek jugnū ne ye nukta mujhe ta.alīm kiyā

kis pe poshīda raho kis pe ayaañ honā hai

is liye taultī rahtī haiñ paroñ ko rūheñ

hukm aate hī sar-e-arsh-e-ravāñ honā hai

vaqt aa pahuñchā hai ab taḳht girā.e jaa.eñ

dosto ham se hī ye kār-e-garāñ honā hai

is qadar dil ne ḳhasāra to nahīñ sochā thā

ye to tai thā ki mohabbat meñ ziyāñ honā hai

maz.hab-e-ishq meñ jaa.ez hai sabhī kuchh 'hāshim'

aaj tum jaan ho kal dushman-e-jāñ honā hai

kaun se shahr mein kis ghar mein kahan hona hai

main wahan hota nahin mujh ko jahan hona hai

ek jugnu ne ye nukta mujhe talim kiya

kis pe poshida raho kis pe ayan hona hai

is liye taulti rahti hain paron ko ruhen

hukm aate hi sar-e-arsh-e-rawan hona hai

waqt aa pahuncha hai ab taKHt girae jaen

dosto hum se hi ye kar-e-garan hona hai

is qadar dil ne KHasara to nahin socha tha

ye to tai tha ki mohabbat mein ziyan hona hai

mazhab-e-ishq mein jaez hai sabhi kuchh 'hashim'

aaj tum jaan ho kal dushman-e-jaan hona hai