kaun us tegh-e-sitam-gar se bacha

kaun us teġh-e-sitam-gar se bachā

jo bachā apne muqaddar se bachā

saaf inkār hī behtar hai ki maiñ

zahmat-e-arz-e-mukarrar se bachā

le na Dūbeñ mirī maujeñ mujh ko

aa mujhe mere samundar se bachā

jis ko ā.īna banānā ho tujhe

aise patthar ko mire sar se bachā

rāste meñ mujhe manzil na milī

ye bhī achchhā huā Thokar se bachā

āshiyāñ shāḳh-e-havā par us kā

mere TuuTe hue shahpar se bachā

mahbas-e-zāt se bāhar le chal

mujh ko is gumbad-e-be-dar se bachā

maiñ jo 'mohsin' huā majrūh to kyā

vo bhī kab vaqt ke ḳhanjar se bachā

kaun us tegh-e-sitam-gar se bacha

jo bacha apne muqaddar se bacha

saf inkar hi behtar hai ki main

zahmat-e-arz-e-mukarrar se bacha

le na Duben meri maujen mujh ko

aa mujhe mere samundar se bacha

jis ko aaina banana ho tujhe

aise patthar ko mere sar se bacha

raste mein mujhe manzil na mili

ye bhi achchha hua Thokar se bacha

aashiyan shaKH-e-hawa par us ka

mere TuTe hue shahpar se bacha

mahbas-e-zat se bahar le chal

mujh ko is gumbad-e-be-dar se bacha

main jo 'mohsin' hua majruh to kya

wo bhi kab waqt ke KHanjar se bacha