kaun yan sath liye taj-o-sarir aaya hai

kaun yaañ saath liye tāj-o-sarīr aayā hai

yaañ to jo aayā hai pahle so faqīr aayā hai

ishq laayā hai faqat ek hī siine kī sipar

husn bāñdhe hue sau tarkash-o-tīr aayā hai

kal kisī shaḳhs ne us shoḳh se jā kar ye kahā

aaj dar par tire ik āshiq-e-pīr aayā hai

pusht ḳham-karda asā haath meñ gardan hiltī

zo.af-e-pīrī se nihāyat hī haqīr aayā hai

sun ke ye shakl-o-shabāhat terī us shoḳh ne aah

vahīñ ma.alūm kyā ye ki 'nazīr' aayā hai

kaun yan sath liye taj-o-sarir aaya hai

yan to jo aaya hai pahle so faqir aaya hai

ishq laya hai faqat ek hi sine ki sipar

husn bandhe hue sau tarkash-o-tir aaya hai

kal kisi shaKHs ne us shoKH se ja kar ye kaha

aaj dar par tere ek aashiq-e-pir aaya hai

pusht KHam-karda asa hath mein gardan hilti

zoaf-e-piri se nihayat hi haqir aaya hai

sun ke ye shakl-o-shabahat teri us shoKH ne aah

wahin malum kya ye ki 'nazir' aaya hai