kaundh uTThi kabhi bijli kabhi baadal chamka

kauñdh uTThī kabhī bijlī kabhī bādal chamkā

ḳhalvat-e-husn kā har gosha musalsal chamkā

jagmagātī rahī jalvoñ se tire bazm-e-nigāh

kabhī gesū kabhī 'āriz kabhī āñchal chamkā

phuuT niklī kabhī hoñThoñ se koī shoḳh kiran

kabhī palkoñ kī ghanī chhāñv meñ kājal chamkā

sail-e-naġhmāt meñ shab terī sadā kā sho'la

kabhī ojhal huā ik pal kabhī ik pal chamkā

gesū-e-shab ke mahakte hue saa.e ke tale

misl-e-ā.īna tirā jism jhalā-jhal chamkā

'zeb' naġhmoñ ke charāġhāñ meñ kise hosh thā kal

ik sitāra mirī mizhgāñ pe musalsal chamkā

kaundh uTThi kabhi bijli kabhi baadal chamka

KHalwat-e-husn ka har gosha musalsal chamka

jagmagati rahi jalwon se tere bazm-e-nigah

kabhi gesu kabhi 'ariz kabhi aanchal chamka

phuT nikli kabhi honThon se koi shoKH kiran

kabhi palkon ki ghani chhanw mein kajal chamka

sail-e-naghmat mein shab teri sada ka sho'la

kabhi ojhal hua ek pal kabhi ek pal chamka

gesu-e-shab ke mahakte hue sae ke tale

misl-e-aina tera jism jhala-jhal chamka

'zeb' naghmon ke charaghan mein kise hosh tha kal

ek sitara meri mizhgan pe musalsal chamka