KHak chhani na kisi dasht mein wahshat ki hai

ḳhaak chhānī na kisī dasht meñ vahshat kī hai

maiñ ne ik shaḳhs se ujrat pe mohabbat kī hai

ḳhud ko dhutkār diyā maiñ ne to is duniyā ne

merī auqāt se baḌh kar mirī izzat kī hai

jī meñ aatā hai mirī mujh se mulāqāt na ho

baat milne kī nahīñ baat tabī.at kī hai

ab bhī thoḌī sī mire dil meñ paḌī hai shāyad

zard sī dhuup jo dīvār se ruḳhsat kī hai

aaj jī bhar ke tujhe dekhā to mahsūs huā

aañkh ne sūra-e-yūsuf kī tilāvat kī hai

haal pūchhā hai mirā poñchhe haiñ aañsū mere

shukriya tum ne mire dard meñ shirkat kī hai

KHak chhani na kisi dasht mein wahshat ki hai

main ne ek shaKHs se ujrat pe mohabbat ki hai

KHud ko dhutkar diya main ne to is duniya ne

meri auqat se baDh kar meri izzat ki hai

ji mein aata hai meri mujh se mulaqat na ho

baat milne ki nahin baat tabiat ki hai

ab bhi thoDi si mere dil mein paDi hai shayad

zard si dhup jo diwar se ruKHsat ki hai

aaj ji bhar ke tujhe dekha to mahsus hua

aankh ne sura-e-yusuf ki tilawat ki hai

haal puchha hai mera ponchhe hain aansu mere

shukriya tum ne mere dard mein shirkat ki hai