KHak-dan ko hasil-e-zauq-e-nazar samjha tha main

ḳhāk-dāñ ko hāsil-e-zauq-e-nazar samjhā thā maiñ

ḳhvāb ke aalam ko kitnā mo'atabar samjhā thā maiñ

kyā ḳhabar thī mil ke tū mujh se judā ho jā.egā

is dhundalke ko na jaane kyuuñ sahar samjhā thā maiñ

aaj phirtī hai nazar har raah meñ bhaTkī huī

kyuuñ ġhubār-e-kārvāñ ko rāhbar samjhā thā maiñ

apne andar dekhtā thā jalva-hā-e-rañg-rañg

jism-e-ḳhākī ko bhī ik shīshe kā ghar samjhā thā maiñ

aa gayā manzil pe har patthar ko Thukrātā huā

aap ke ġham ko har ik ġham kī sipar samjhā thā maiñ

munkashif mujh par huā 'jāmī' vo rahbar thā mirā

jis haqīqat-āshnā ko bāzīgar samjhā thā maiñ

KHak-dan ko hasil-e-zauq-e-nazar samjha tha main

KHwab ke aalam ko kitna mo'atabar samjha tha main

kya KHabar thi mil ke tu mujh se juda ho jaega

is dhundalke ko na jaane kyun sahar samjha tha main

aaj phirti hai nazar har rah mein bhaTki hui

kyun ghubar-e-karwan ko rahbar samjha tha main

apne andar dekhta tha jalwa-ha-e-rang-rang

jism-e-KHaki ko bhi ek shishe ka ghar samjha tha main

aa gaya manzil pe har patthar ko Thukraata hua

aap ke gham ko har ek gham ki sipar samjha tha main

munkashif mujh par hua 'jami' wo rahbar tha mera

jis haqiqat-ashna ko bazigar samjha tha main