KHak ka rizq yahan har kas-o-na-kas nikla

ḳhaak kā rizq yahāñ har kas-o-nā-kas niklā

ye badan sīñchne vaalā baḌā bebas niklā

vo jo kartā thā sadā ḳhirqa-e-darvesh kī baat

vo bhī darbār meñ vārafta-e-atlas niklā

zarfishāñ hai mirī zarḳhez zamīnoñ kā badan

zarra zarra mire punjab kā pāras niklā

merī hairat ko bhī tārīḳh meñ mahfūz karo

mere ahbāb meñ har shaḳhs buroTas niklā

titliyāñ pyaar kī thak-hār ke lauT aa.ī haiñ

ġhuncha-e-chashm hī us shaḳhs kā be-ras niklā

ye qalam mujrim-e-tausīf-e-ġhazālāñ 'anjum'

vaqt paḌne pe to ye fiil kā āñkas niklā

KHak ka rizq yahan har kas-o-na-kas nikla

ye badan sinchne wala baDa bebas nikla

wo jo karta tha sada KHirqa-e-darwesh ki baat

wo bhi darbar mein warafta-e-atlas nikla

zarfishan hai meri zarKHez zaminon ka badan

zarra zarra mere punjab ka paras nikla

meri hairat ko bhi tariKH mein mahfuz karo

mere ahbab mein har shaKHs buroTas nikla

titliyan pyar ki thak-haar ke lauT aai hain

ghuncha-e-chashm hi us shaKHs ka be-ras nikla

ye qalam mujrim-e-tausif-e-ghazalan 'anjum'

waqt paDne pe to ye fil ka aankas nikla