KHak kar Dalen abhi chahen to mai-KHane ko hum

ḳhaak kar Dāleñ abhī chāheñ to mai-ḳhāne ko ham

ek sāġhar ko bharo tum ek paimāne ko ham

mujh se ham-āġhosh ho kar yuuñ kahā aur sach kahā

hoshiyār is tarah kar dete haiñ dīvāne ko ham

naza.a meñ aa.e haiñ sad afsos jīte-jī na aa.e

vo haiñ aane ko to ab tayyār haiñ jaane ko ham

be-natīja un pe marnā yaad aatā hai hameñ

sham.a par jab dekhte haiñ marte parvāne ko ham

kohkan aur qais kī qabroñ se aatī hai sadā

kyā mukammal kar ga.e ulfat ke afsāne ko ham

ek pattā bhī nahīñ hiltā ba-juz hukm-e-ḳhudā

kis tarah ābād kar leñ apne vīrāne ko ham

ek din ye hai ki haiñ ik sham.a-rū par ḳhud nisār

ek din vo thā burā kahte the parvāne ko ham

abruoñ ne sach kahā us ke ishāre kī hai der

dekhte bilkul nahīñ phir apne begāne ko ham

jaan jaa.e yā rahe us ko sunā.eñge zarūr

qais ke parda meñ 'parvīñ' apne afsāne ko ham

KHak kar Dalen abhi chahen to mai-KHane ko hum

ek saghar ko bharo tum ek paimane ko hum

mujh se ham-aghosh ho kar yun kaha aur sach kaha

hoshiyar is tarah kar dete hain diwane ko hum

naza mein aae hain sad afsos jite-ji na aae

wo hain aane ko to ab tayyar hain jaane ko hum

be-natija un pe marna yaad aata hai hamein

shama par jab dekhte hain marte parwane ko hum

kohkan aur qais ki qabron se aati hai sada

kya mukammal kar gae ulfat ke afsane ko hum

ek patta bhi nahin hilta ba-juz hukm-e-KHuda

kis tarah aabaad kar len apne virane ko hum

ek din ye hai ki hain ek shama-ru par KHud nisar

ek din wo tha bura kahte the parwane ko hum

abruon ne sach kaha us ke ishaare ki hai der

dekhte bilkul nahin phir apne begane ko hum

jaan jae ya rahe us ko sunaenge zarur

qais ke parda mein 'parwin' apne afsane ko hum