KHak karti hai ba-rang-e-charKH-e-nili-fam raqs

ḳhaak kartī hai ba-rañg-e-charḳh-e-nīlī-fām raqs

har do-ālam ko tirā rakhtā hai be-ārām raqs

dekhiye piirī kā haal aur dekhiye rīsh-e-safed

shaiḳh sāhab nā-munāsib hai ye be-hañgām raqs

ablaq-e-chashm-e-butāñ kī shoḳhiyāñ chakrā ga.iiñ

āsmāñ par mehr-o-mah karte haiñ sub.h-o-shām raqs

ho haqīqī yā majāzī ishq kī hālat na pūchh

ḳhānqa meñ mai hai aur mai-ḳhāne meñ badnām raqs

saumi.a meñ vaj.h-e-sad-tahsīñ huā suufī kā haal

mai-kade meñ aan kar kyuuñ ho gayā badnām raqs

nargis-e-maḳhmūr-e-jānāñ Daal detī gar nigāh

mardum-e-chashm-e-butāñ kī tarah kartā jaam raqs

āshiqāñ abrū-e-but kī hai taa.at iztirāb

thī namāz ahl-e-haram jab tak na thā islām raqs

gird phirtā huuñ jo is bar ke to vaa.iz kyā huā

tauf meñ kartā hai tū bhī bāñdh kar ehrām raqs

bahr meñ gardāb hai aur dasht meñ hai gard-bād

ḳhushk-o-tar meñ hai tirī shoḳhī se ai gulfām raqs

shoḳh ne barham nizām-e-mahfil-e-imkāñ kiyā

ḳhaak ne chheḌā hai gardūñ ne liyā hai thaam raqs

pā.emāl-e-ġham pise jaate haiñ surme kī tarah

le uḌī kis ke qadam se gardish-e-ayyām raqs

terī shoḳhī se tirī raftār se ai rashk-e-bāġh

chaukḌī bholā hiran tā.ūs-e-gul-andām raqs

aish jāved un ko hāsil hai jo haiñ terī taraf

tā.er-e-qibla-numā kartā hai sub.h-o-shām raqs

KHak karti hai ba-rang-e-charKH-e-nili-fam raqs

har do-alam ko tera rakhta hai be-aram raqs

dekhiye piri ka haal aur dekhiye rish-e-safed

shaiKH sahab na-munasib hai ye be-hangam raqs

ablaq-e-chashm-e-butan ki shoKHiyan chakra gain

aasman par mehr-o-mah karte hain subh-o-sham raqs

ho haqiqi ya majazi ishq ki haalat na puchh

KHanqa mein mai hai aur mai-KHane mein badnam raqs

saumia mein wajh-e-sad-tahsin hua sufi ka haal

mai-kade mein aan kar kyun ho gaya badnam raqs

nargis-e-maKHmur-e-jaanan Dal deti gar nigah

mardum-e-chashm-e-butan ki tarah karta jam raqs

aashiqan abru-e-but ki hai taat iztirab

thi namaz ahl-e-haram jab tak na tha islam raqs

gird phirta hun jo is bar ke to waiz kya hua

tauf mein karta hai tu bhi bandh kar ehram raqs

bahr mein gardab hai aur dasht mein hai gard-baad

KHushk-o-tar mein hai teri shoKHi se ai gulfam raqs

shoKH ne barham nizam-e-mahfil-e-imkan kiya

KHak ne chheDa hai gardun ne liya hai tham raqs

paemal-e-gham pise jate hain surme ki tarah

le uDi kis ke qadam se gardish-e-ayyam raqs

teri shoKHi se teri raftar se ai rashk-e-bagh

chaukDi bhola hiran taus-e-gul-andam raqs

aish jawed un ko hasil hai jo hain teri taraf

taer-e-qibla-numa karta hai subh-o-sham raqs