KHak ko jis dam jauhar ka idrak hua

ḳhaak ko jis dam jauhar kā idrāk huā

zarra zamīñ se uTThā aur aflāk huā

khulte khulte us ko bhī kuchh vaqt lagā

hote hote maiñ bhī kuchh bebāk huā

dhīre dhīre kirnoñ kī yalġhār huī

dhīre dhīre raat kā siina chaak huā

dasht-e-junūñ se zanjīroñ kā shor uThā

ret uḌātā sahrā vahshat-nāk huā

saare bakheḌe ek zarā sī der ke the

tār-e-nafas jab TuuTā qissa paak huā

rafta rafta shāḳh-e-badan par phuul khile

rafta rafta ḳhud meñ vo chālāk huā

KHak ko jis dam jauhar ka idrak hua

zarra zamin se uTTha aur aflak hua

khulte khulte us ko bhi kuchh waqt laga

hote hote main bhi kuchh bebak hua

dhire dhire kirnon ki yalghaar hui

dhire dhire raat ka sina chaak hua

dasht-e-junun se zanjiron ka shor uTha

ret uData sahra wahshat-nak hua

sare bakheDe ek zara si der ke the

tar-e-nafas jab TuTa qissa pak hua

rafta rafta shaKH-e-badan par phul khile

rafta rafta KHud mein wo chaalak hua