KHak mein kyun meri dastar milai hui hai

ḳhaak meñ kyuuñ mirī dastār milā.ī huī hai

maiñ ne izzat baḌī mushkil se kamā.ī huī hai

chāñd kāġhaz pe banānā hai abhī ek mujhe

abhī manzar meñ faqat jhiil banā.ī huī hai

titliyāñ roz hī aatī haiñ unheñ milne ko

kis kī ḳhushbū hai jo phūloñ ne churā.ī huī hai

jāgnā chāhtā huuñ der talak saath tire

merī āñkhoñ meñ magar niiñd jo aa.ī huī hai

aap tanqīd kareñ aap kā haq hai sāhab

ye ġhazal 'mīr' ko maiñ ne to sunā.ī huī hai

is ko dīvār pe maiñ kaise lagā duuñ 'ahmad'

ek tasvīr jo siine se lagā.ī huī hai

KHak mein kyun meri dastar milai hui hai

main ne izzat baDi mushkil se kamai hui hai

chand kaghaz pe banana hai abhi ek mujhe

abhi manzar mein faqat jhil banai hui hai

titliyan roz hi aati hain unhen milne ko

kis ki KHushbu hai jo phulon ne churai hui hai

jagna chahta hun der talak sath tere

meri aankhon mein magar nind jo aai hui hai

aap tanqid karen aap ka haq hai sahab

ye ghazal 'mir' ko main ne to sunai hui hai

is ko diwar pe main kaise laga dun 'ahmad'

ek taswir jo sine se lagai hui hai