KHak mein milna tha aaKHir be-nishan hona hi tha

ḳhaak meñ milnā thā āḳhir be-nishāñ honā hī thā

jalne vaale ke muqaddar meñ dhuāñ honā hī thā

ham na kahte the ki diide phuuT jā.eñge tire

raat din rone se āñkhoñ kā ziyāñ honā hī thā

harf-e-sākit ban gayā taqtī.a se ḳhārij huā

is ġhazal kī bazm se mujh ko nihāñ honā hī thā

kyā huā jo bhuul baiThe haiñ sabhī qaarī mujhe

ik na ik din mujh ko bhūlī dāstāñ honā hī thā

dhaar par chalnā thā mujh ko kūdnā thā aag meñ

zindagī meñ ek din ye imtihāñ honā hī thā

ruī ban kar uḌ ga.e parbat zamīñ hai zer-e-āb

ye karishma bhī to zer-e-āsmāñ honā hī thā

sabr kar 'hasrat' na ro ujḌe chaman ko dekh kar

dīdanī manzar ko āñkhoñ se nihāñ honā hī thā

KHak mein milna tha aaKHir be-nishan hona hi tha

jalne wale ke muqaddar mein dhuan hona hi tha

hum na kahte the ki dide phuT jaenge tere

raat din rone se aankhon ka ziyan hona hi tha

harf-e-sakit ban gaya taqtia se KHarij hua

is ghazal ki bazm se mujh ko nihan hona hi tha

kya hua jo bhul baiThe hain sabhi qari mujhe

ek na ek din mujh ko bhuli dastan hona hi tha

dhaar par chalna tha mujh ko kudna tha aag mein

zindagi mein ek din ye imtihan hona hi tha

rui ban kar uD gae parbat zamin hai zer-e-ab

ye karishma bhi to zer-e-asman hona hi tha

sabr kar 'hasrat' na ro ujDe chaman ko dekh kar

didani manzar ko aankhon se nihan hona hi tha