KHak ne apna tasallut tha jamaya jis dam

ḳhaak ne apnā tasallut thā jamāyā jis dam

maiñ ne aflāk ko sochoñ se uThāyā jis dam

mere atrāf bhī kohrām kā bādal barsā

maiñ ne ik shaḳhs ko kuchh der hī sochā jis dam

rābta TuuT ke hairānī talak aa pahuñchā

ek apnā mirā aġhyār meñ baiThā jis dam

vaqt to aan hī pahuñchā thā tire vasl kā bhī

silsila saañs kā us ruuh se TuuTā jis dam

merī āvāz mire paas palaT aa.ī thī

maiñ ne tanhā.ī meñ apnoñ ko pukārā jis dam

ro paḌā peḌ kisī dard kī lai ko le kar

ik parinde ne harī shāḳh ko nochā jis dam

dil mirā kostā rahtā hai usī pal ko 'humā'

ek patthar se bane but ko thā puujā jis dam

KHak ne apna tasallut tha jamaya jis dam

main ne aflak ko sochon se uThaya jis dam

mere atraf bhi kohram ka baadal barsa

main ne ek shaKHs ko kuchh der hi socha jis dam

rabta TuT ke hairani talak aa pahuncha

ek apna mera aghyar mein baiTha jis dam

waqt to aan hi pahuncha tha tere wasl ka bhi

silsila sans ka us ruh se TuTa jis dam

meri aawaz mere pas palaT aai thi

main ne tanhai mein apnon ko pukara jis dam

ro paDa peD kisi dard ki lai ko le kar

ek parinde ne hari shaKH ko nocha jis dam

dil mera kosta rahta hai usi pal ko 'huma'

ek patthar se bane but ko tha puja jis dam