ḳhaak oḌhe hue ik ḳhvāb kī ta.abīr kā dukh
us ko khā jā.egā ik din merī tash.hīr kā dukh
tum ne zindāñ meñ faqat merī asīrī dekhī
ab dilā dekh zarā paaoñ kī zanjīr kā dukh
jis ne kaaTā hai javānī meñ buḌhāpe kā safar
aa batātī huuñ tujhe haa.e mire viir kā dukh
vaqt-e-ruḳhsat vo jo palkoñ meñ chhupāyā tum ne
dil meñ ab tak bhī javāñ hai usī ik niir kā dukh
ishq meñ ḳhaak jo chhānoge samajh jāoge
būḌhe bargad ke tale baiThe hue piir kā dukh
haañ vahī jhang jahāñ vang ke charche haiñ bahut
par mere dil meñ nihāñ rahtā hai ik hiir kā dukh
varna sheroñ meñ tire maut sī vahshat hogī
haa.e tujh ko na lage 'mīr' taqī 'mīr' kā dukh
vo jo pal pal rahā masrūf ki maiñ gir jā.ūñ
kaise sah pā.egā 'zarrīñ' mirī ta.amīr kā dukh
KHak oDhe hue ek KHwab ki tabir ka dukh
us ko kha jaega ek din meri tashhir ka dukh
tum ne zindan mein faqat meri asiri dekhi
ab dila dekh zara paon ki zanjir ka dukh
jis ne kaTa hai jawani mein buDhape ka safar
aa batati hun tujhe hae mere wir ka dukh
waqt-e-ruKHsat wo jo palkon mein chhupaya tum ne
dil mein ab tak bhi jawan hai usi ek nir ka dukh
ishq mein KHak jo chhanoge samajh jaoge
buDhe bargad ke tale baiThe hue pir ka dukh
han wahi jhang jahan wang ke charche hain bahut
par mere dil mein nihan rahta hai ek hir ka dukh
warna sheron mein tere maut si wahshat hogi
hae tujh ko na lage 'mir' taqi 'mir' ka dukh
wo jo pal pal raha masruf ki main gir jaun
kaise sah paega 'zarrin' meri tamir ka dukh
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.