KHak par KHun ki tahrir se pahchane gae

ḳhaak par ḳhuun kī tahrīr se pahchāne ga.e

tire vahshī tirī zanjīr se pahchāne ga.e

apnī tasvīr se mumkin hī na thī apnī shanāḳht

ham kisī aur kī tasvīr se pahchāne ga.e

jin meñ raushan thā tirī diid kā saudā vo sar

laakh añdhere meñ bhī shamshīr se pahchāne ga.e

kyā qayāmat hai ki sau baar ke soche hue log

sāmne aa.e to tāḳhīr se pahchāne ga.e

dost pahchāne ga.e apne nishāne se aur

ham bhī siine meñ lage tiir se pahchāne ga.e

ḳhvāb meñ to koī chehra hī nahīñ thā un kā

haiñ kuchh ik ġham ki jo ta.abīr se pahchāne ga.e

ḳhāmushī asl meñ uslūb thī ham jaisoñ kā

ham isī lahja-e-taqrīr se pahchāne ga.e

zehn-e-tārīk meñ be-nām-o-nasab the kuchh dard

jo chamak uThne kī tadbīr se pahchāne ga.e

KHak par KHun ki tahrir se pahchane gae

tere wahshi teri zanjir se pahchane gae

apni taswir se mumkin hi na thi apni shanaKHt

hum kisi aur ki taswir se pahchane gae

jin mein raushan tha teri did ka sauda wo sar

lakh andhere mein bhi shamshir se pahchane gae

kya qayamat hai ki sau bar ke soche hue log

samne aae to taKHir se pahchane gae

dost pahchane gae apne nishane se aur

hum bhi sine mein lage tir se pahchane gae

KHwab mein to koi chehra hi nahin tha un ka

hain kuchh ek gham ki jo tabir se pahchane gae

KHamushi asl mein uslub thi hum jaison ka

hum isi lahja-e-taqrir se pahchane gae

zehn-e-tarik mein be-nam-o-nasab the kuchh dard

jo chamak uThne ki tadbir se pahchane gae