KHak par nind mayassar bhi to ho sakti hai

ḳhaak par niiñd mayassar bhī to ho saktī hai

vahshat-e-dasht mire saath meñ so saktī hai

āshnā hai vo mirī miTTī kī zarḳhezī se

vo mire jism pe ab zaḳhm bhī bo saktī hai

thaam le haath mirā mujh se kināra mat kar

varna is baar tū sach-much mujhe kho saktī hai

de nahīñ sakte dilāsa dar-o-dīvār tujhe

dekh tū mujh se lipaT kar bhī to ro saktī hai

ashk hī aañkh se Tapkeñ ye zarūrī to nahīñ

os bhī to mire dāman ko bhigo saktī hai

zindagī tujh ko to aatī hai kashīdakārī

kyā mire sar ko bhī neze meñ piro saktī hai

fikr būḌhī to bahut hai mirī lekin ab bhī

bojh alfāz kā āsānī se Dho saktī hai

KHak par nind mayassar bhi to ho sakti hai

wahshat-e-dasht mere sath mein so sakti hai

aashna hai wo meri miTTi ki zarKHezi se

wo mere jism pe ab zaKHm bhi bo sakti hai

tham le hath mera mujh se kinara mat kar

warna is bar tu sach-much mujhe kho sakti hai

de nahin sakte dilasa dar-o-diwar tujhe

dekh tu mujh se lipaT kar bhi to ro sakti hai

ashk hi aankh se Tapken ye zaruri to nahin

os bhi to mere daman ko bhigo sakti hai

zindagi tujh ko to aati hai kashidakari

kya mere sar ko bhi neze mein piro sakti hai

fikr buDhi to bahut hai meri lekin ab bhi

bojh alfaz ka aasani se Dho sakti hai