KHak-ta-KHak wo pahchan na paya hai mujhe

ḳhāk-tā-ḳhāk vo pahchān na paayā hai mujhe

us ne har baar havāoñ meñ uḌāyā hai mujhe

chāhtā huuñ ki mujhe toḌ de ab us kā sukūt

jis kī āvāz ne ā.īna banāyā hai mujhe

ab girah meñ nahīñ khone ke liye kuchh baaqī

zindagī tū ne bhī kis moḌ pe paayā hai mujhe

maiñ tirī raah kī dīvār nahīñ thā ai dost

tū ne kyā jaan ke nazroñ se girāyā hai mujhe

raushnī merī añdheroñ se ulajh saktī thī

merā dukh ye hai ki sūraj ne bujhāyā hai mujhe

ab sañbhalne nahīñ degā kahīñ tanhā.ī kā bojh

chhoḌne vo mirī dahlīz tak aayā hai mujhe

maiñ koī gauhar-e-nāyāb nahīñ huuñ 'rāshid'

kyā samajh ke koī bāzār meñ laayā hai mujhe

KHak-ta-KHak wo pahchan na paya hai mujhe

us ne har bar hawaon mein uDaya hai mujhe

chahta hun ki mujhe toD de ab us ka sukut

jis ki aawaz ne aaina banaya hai mujhe

ab girah mein nahin khone ke liye kuchh baqi

zindagi tu ne bhi kis moD pe paya hai mujhe

main teri rah ki diwar nahin tha ai dost

tu ne kya jaan ke nazron se giraya hai mujhe

raushni meri andheron se ulajh sakti thi

mera dukh ye hai ki suraj ne bujhaya hai mujhe

ab sanbhalne nahin dega kahin tanhai ka bojh

chhoDne wo meri dahliz tak aaya hai mujhe

main koi gauhar-e-nayab nahin hun 'rashid'

kya samajh ke koi bazar mein laya hai mujhe