Khaaliq ho KHuda-e-sahar-o-sham hamara

ḳhāliq ho ḳhudā-e-sahar-o-shām hamārā

mash.hūr usī ne ye kiyā naam hamārā

aatī hai havā sard ghaTā uThtī hai ghanghor

mañgvāo surāhī-o-mai-o-jām hamārā

betābī-e-dil un ke bhī dil meñ tū asar kar

muddat se yahī tujh se hai paiġhām hamārā

ham karte haiñ haj kūcha-e-dildār kā apne

hai chādar-e-tan jāma-e-ahrām hamārā

furqat meñ tirī saath diyā apnā isī ne

kaam aayā bahut ye dil-e-nākām hamārā

kāfir kiyā mujh ko tirī is zulf ne kāfir

is laam ne khoyā tire islām hamārā

duniyā meñ baḌā shor hai shakkar-shiknī kā

'shīrīñ' jo taḳhallus meñ huā naam hamārā

KHaliq ho KHuda-e-sahar-o-sham hamara

mashhur usi ne ye kiya nam hamara

aati hai hawa sard ghaTa uThti hai ghanghor

mangwao surahi-o-mai-o-jam hamara

betabi-e-dil un ke bhi dil mein tu asar kar

muddat se yahi tujh se hai paigham hamara

hum karte hain haj kucha-e-dildar ka apne

hai chadar-e-tan jama-e-ahram hamara

furqat mein teri sath diya apna isi ne

kaam aaya bahut ye dil-e-nakaam hamara

kafir kiya mujh ko teri is zulf ne kafir

is lam ne khoya tere islam hamara

duniya mein baDa shor hai shakkar-shikni ka

'shirin' jo taKHallus mein hua nam hamara