KHamushi-e-dil kisi shab itna Dar jaenge hum

ḳhāmushī-e-dil kisī shab itnā Dar jā.eñge ham

chauñk kar ik saañs kī aahaT se mar jā.eñge ham

āsmāñ sūraj nikal aa.e bas itnā sabr kar

saath kirnoñ ke zamīñ par phir utar jā.eñge ham

ḳhushk hoñThoñ ne bulāyā hai hameñ darbār meñ

saath le ke apne nazr-e-chashm-e-tar jā.eñge ham

sochtī rah jā.egī duniyā ise kyā naam duuñ

zindagī tujh meñ ik aisā rang bhar jā.eñge ham

ab nahīñ baiThā kareñge bus meñ khiḌkī kī taraf

terī bastī ko binā dekhe guzar jā.eñge ham

ye jahāñ niklā tavaqqo' se ziyāda muḳhtasar

alvidā' ai dosto ab apne ghar jā.eñge ham

KHamushi-e-dil kisi shab itna Dar jaenge hum

chaunk kar ek sans ki aahaT se mar jaenge hum

aasman suraj nikal aae bas itna sabr kar

sath kirnon ke zamin par phir utar jaenge hum

KHushk honThon ne bulaya hai hamein darbar mein

sath le ke apne nazr-e-chashm-e-tar jaenge hum

sochti rah jaegi duniya ise kya nam dun

zindagi tujh mein ek aisa rang bhar jaenge hum

ab nahin baiTha karenge bus mein khiDki ki taraf

teri basti ko bina dekhe guzar jaenge hum

ye jahan nikla tawaqqo' se ziyaada muKHtasar

alwida' ai dosto ab apne ghar jaenge hum