KHamushi jis dam faza mein raqs farmane lagi

ḳhāmushī jis dam fazā meñ raqs farmāne lagī

phuul par shabnam ke girne kī sadā aane lagī

mahv-e-hairat hai nigāh-e-shauq bhī ye dekh kar

un ke sar pe dhuup aa.ī aur ghaTā chhāne lagī

garmi-e-lab kī zarūrat jab paḌī ruḳhsār ko

chashm-e-pur-nam hasratoñ kī aag barsāne lagī

rakh diye taqdīr ke saare sitāre toḌ kar

jab haqīqat aa.ina qismat ko dikhlāne lagī

ratjagoñ ke dasht-e-vahshat meñ bhaTaktī rah ga.ī

niiñd bhī āñkhoñ ke dar pe aa ke pachhtāne lagī

is qadar tārīkiyāñ haiñ raushnī ke ruup meñ

tīrgī tīra-sifat hone pe sharmāne lagī

umr bhar kartī rahī manzil hamārī justujū

jab nazar ke sāmne aa.ī to katrāne lagī

din bhī saare ek jaise raat bhī yaksāñ 'shakīl'

is tarah jiine se ab to ziist uktāne laggī

KHamushi jis dam faza mein raqs farmane lagi

phul par shabnam ke girne ki sada aane lagi

mahw-e-hairat hai nigah-e-shauq bhi ye dekh kar

un ke sar pe dhup aai aur ghaTa chhane lagi

garmi-e-lab ki zarurat jab paDi ruKHsar ko

chashm-e-pur-nam hasraton ki aag barsane lagi

rakh diye taqdir ke sare sitare toD kar

jab haqiqat aaina qismat ko dikhlane lagi

ratjagon ke dasht-e-wahshat mein bhaTakti rah gai

nind bhi aankhon ke dar pe aa ke pachhtane lagi

is qadar tarikiyan hain raushni ke rup mein

tirgi tira-sifat hone pe sharmane lagi

umr bhar karti rahi manzil hamari justuju

jab nazar ke samne aai to katrane lagi

din bhi sare ek jaise raat bhi yaksan 'shakil'

is tarah jine se ab to zist uktane laggi