KHana-ba-dosh rahne ki aadat nahin gai

ḳhāna-ba-dosh rahne kī aadat nahīñ ga.ī

insāñ ke dil se ḳhvāhish-e-hijrat nahīñ ga.ī

dar dar kī ḳhaak chhān rahe haiñ abhī talak

dil se hayāt-āshnā vahshat nahīñ ga.ī

kuchh pur-ḳhulūs dost mayassar haiñ is liye

āñkhoñ se ḳhush-gumānī kī aadat nahīñ ga.ī

jab tak nafas meñ sabr-o-qanā.at the ḳhema-zan

ghar se hamāre rizq kī barakat nahīñ ga.ī

lamha-ba-lamha TūTte rahne ke bāvajūd

kohsār-e-ḳhush-jamāl kī rif.at nahīñ ga.ī

sad-shukr sun rahā huuñ maiñ ab bhī sadā-e-vaqt

is shor meñ bhī merī samā.at nahīñ ga.ī

murjhā gayā kitāb meñ rakkhā huā ye phuul

lekin hanūz is kī latāfat nahīñ ga.ī

dāmān-e-chashm-e-shauq lahū se hai tar-ba-tar

āñkhoñ se phir bhī ḳhvāb kī chāhat nahīñ ga.ī

pagḌī batā rahī hai ki sar par ġhurūr se

kotāh-qāmatī kī alāmat nahīñ ga.ī

us ko zamīñ bhī chāhiye vo bhī kafan ke saath

mar kar bhī aadmī kī zarūrat nahīñ ga.ī

is baar sail-e-ashk-e-nadāmat ke saath 'rāz'

āñkhoñ se raushnī-e-nadāmat nahīñ ga.ī

KHana-ba-dosh rahne ki aadat nahin gai

insan ke dil se KHwahish-e-hijrat nahin gai

dar dar ki KHak chhan rahe hain abhi talak

dil se hayat-ashna wahshat nahin gai

kuchh pur-KHulus dost mayassar hain is liye

aankhon se KHush-gumani ki aadat nahin gai

jab tak nafas mein sabr-o-qanaat the KHema-zan

ghar se hamare rizq ki barakat nahin gai

lamha-ba-lamha TuTte rahne ke bawajud

kohsar-e-KHush-jamal ki rifat nahin gai

sad-shukr sun raha hun main ab bhi sada-e-waqt

is shor mein bhi meri samaat nahin gai

murjha gaya kitab mein rakkha hua ye phul

lekin hanuz is ki latafat nahin gai

daman-e-chashm-e-shauq lahu se hai tar-ba-tar

aankhon se phir bhi KHwab ki chahat nahin gai

pagDi bata rahi hai ki sar par ghurur se

kotah-qamati ki alamat nahin gai

us ko zamin bhi chahiye wo bhi kafan ke sath

mar kar bhi aadmi ki zarurat nahin gai

is bar sail-e-ashk-e-nadamat ke sath 'raaz'

aankhon se raushni-e-nadamat nahin gai