KHana-e-dil ki moattar bhi bahut lagta hai

ḳhāna-e-dil ki mo.attar bhī bahut lagtā hai

terī yādoñ se munavvar bhī bahut lagtā hai

garche halkā sā dhuñdlakā hai tasavvur bhī tirā

band āñkhoñ ko ye manzar bhī bahut lagtā hai

sochte haiñ ki jiyeñge tujhe jī bhar ke magar

zindagī tujh se hameñ Dar bhī bahut lagtā hai

pūchh ham se ki haqīqat meñ hai kyā terā vajūd

tere shānoñ pe ye ik sar bhī bahut lagtā hai

farq kuchh bhī nahīñ ehsās-e-tashaḳhḳhus ke sivā

darmiyāñ apne ye antar bhī bahut lagtā hai

ham qanā.at pe guzar karte haiñ 'āqib' ham ko

kachchī dīvāroñ kā ik ghar bhī bahut lagtā hai

KHana-e-dil ki moattar bhi bahut lagta hai

teri yaadon se munawwar bhi bahut lagta hai

garche halka sa dhundlaka hai tasawwur bhi tera

band aankhon ko ye manzar bhi bahut lagta hai

sochte hain ki jiyenge tujhe ji bhar ke magar

zindagi tujh se hamein Dar bhi bahut lagta hai

puchh hum se ki haqiqat mein hai kya tera wajud

tere shanon pe ye ek sar bhi bahut lagta hai

farq kuchh bhi nahin ehsas-e-tashaKHKHus ke siwa

darmiyan apne ye antar bhi bahut lagta hai

hum qanaat pe guzar karte hain 'aqib' hum ko

kachchi diwaron ka ek ghar bhi bahut lagta hai