KHana-e-dil ki tarah sari faza hai ki nahin

ḳhāna-e-dil kī tarah saarī fazā hai ki nahīñ

kis ko ma.alūm ki bāhar bhī havā hai ki nahīñ

jashn barpā to huā thā dam-e-ruḳhsat lekin

vahī hañgāma mire ba.ad bapā hai ki nahīñ

pūchhtā hai ye har ik ḳhār-e-sar-e-dasht-e-junūñ

aane vaalā bhī koī ābla-pā hai ki nahīñ

dekh to jā ke masīhā-e-ġham-e-ishq use

haath ab tak yūñhī siine pe dharā hai ki nahīñ

dil ke tārīk dar-o-bām se aksar tirā ġham

pūchhtā hai ki koī mere sivā hai ki nahīñ

maiñ kahīñ huuñ ki nahīñ huuñ vo kabhī thā ki na thā

tū hī kah de ye suḳhan be-sar-o-pā hai ki nahīñ

faisla lauT ke jaane kā hai kitnā mushkil

kis se pūchhūñ vo mujhe bhuul chukā hai ki nahīñ

maiñ to vāraftagī-e-shauq meñ jaatā huuñ udhar

nahīñ ma.alūm vo āġhosh bhī vā hai ki nahīñ

jaane kyā rañg chaman kā hai dam-e-sub.h-e-firāq

gul khile haiñ ki nahīñ bād-e-sabā hai ki nahīñ

ai shab-e-hijr zarā der ko bahle to ye dil

dekh 'irfān' kahīñ naġhma-sarā hai ki nahīñ

KHana-e-dil ki tarah sari faza hai ki nahin

kis ko malum ki bahar bhi hawa hai ki nahin

jashn barpa to hua tha dam-e-ruKHsat lekin

wahi hangama mere baad bapa hai ki nahin

puchhta hai ye har ek KHar-e-sar-e-dasht-e-junun

aane wala bhi koi aabla-pa hai ki nahin

dekh to ja ke masiha-e-gham-e-ishq use

hath ab tak yunhi sine pe dhara hai ki nahin

dil ke tarik dar-o-baam se aksar tera gham

puchhta hai ki koi mere siwa hai ki nahin

main kahin hun ki nahin hun wo kabhi tha ki na tha

tu hi kah de ye suKHan be-sar-o-pa hai ki nahin

faisla lauT ke jaane ka hai kitna mushkil

kis se puchhun wo mujhe bhul chuka hai ki nahin

main to waraftagi-e-shauq mein jata hun udhar

nahin malum wo aaghosh bhi wa hai ki nahin

jaane kya rang chaman ka hai dam-e-subh-e-firaq

gul khile hain ki nahin baad-e-saba hai ki nahin

ai shab-e-hijr zara der ko bahle to ye dil

dekh 'irfan' kahin naghma-sara hai ki nahin