ḳhāna-e-dil meñ terā aks banā rakhā hai
ham ne tasvīr ko shīshe meñ sajā rakhā hai
jis kā jī chāhe chalā aa.e hamāre ghar meñ
ham ne is vāste darvāza khulā rakhā hai
sham.a gul kar do nahīñ is kī zarūrat ham ne
dil-e-pur-nūr se aivān sajā rakhā hai
us ke jalvoñ ko kiyā dair-o-haram tak mahdūd
ahl-e-duniyā ne ye kyā svāñg rachā rakhā hai
tum bhī kah lo mujhe jo dil meñ tumhāre aa.e
vaise kyā kahne ko duniyā ne uThā rakhā hai
koī paḌh le na tire naam kā paiġhām un meñ
ham ne is Dar se nigāhoñ ko jhukā rakhā hai
yuuñ hī kuchh kam na the dīvāne ki ab aur hameñ
aap ke husn ne dīvāna banā rakhā hai
dard bechain hai siine meñ magar ham ne 'nazar'
dard kī chīḳh ko aahoñ meñ dabā rakhā hai
KHana-e-dil mein tera aks bana rakha hai
hum ne taswir ko shishe mein saja rakha hai
jis ka ji chahe chala aae hamare ghar mein
hum ne is waste darwaza khula rakha hai
shama gul kar do nahin is ki zarurat hum ne
dil-e-pur-nur se aiwan saja rakha hai
us ke jalwon ko kiya dair-o-haram tak mahdud
ahl-e-duniya ne ye kya swang racha rakha hai
tum bhi kah lo mujhe jo dil mein tumhaare aae
waise kya kahne ko duniya ne uTha rakha hai
koi paDh le na tere nam ka paigham un mein
hum ne is Dar se nigahon ko jhuka rakha hai
yun hi kuchh kam na the diwane ki ab aur hamein
aap ke husn ne diwana bana rakha hai
dard bechain hai sine mein magar hum ne 'nazar'
dard ki chiKH ko aahon mein daba rakha hai
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.