Khaar matlub jo howe to gulistan mangun

ḳhaar matlūb jo hove to gulistāñ māñgūñ

bijlī girne ko jo jī chāhe to bārāñ māñgūñ

sham.a gul hove jo sub.h-e-shab-e-hijrāñ māñgūñ

os paḌnī bhī ho mauqūf jo yārāñ māñgūñ

ḳhaak meñ bhī jo milūñ maiñ to kisī sahrā meñ

tum se miTTī bhī na ai gabr o musalmāñ māñgūñ

baḳht-e-vāzhūñ ne zabāñ ko ye asar baḳhshā hai

talḳhī-e-marg mazā de jo namakdāñ māñgūñ

ḳhāna-e-dil meñ karūñ dāġh-e-mohabbat ko talab

raushnī ke liye is ghar ke jo mehmāñ māñgūñ

pādshāhī se faqīrī kā hai paayā baalā

boriyā chhoḌ ke kyā taḳht-e-sulaimāñ māñgūñ

rañj se ishq ke hai rāht-e-duniyā bad-tar

zaḳhm-e-ḳhandāñ huuñ agar maiñ gul-e-ḳhandāñ māñgūñ

de diyā kījiye saudā.ī tumhārā huuñ miyāñ

sūñghne ko jo kabhī zulf-e-pareshāñ māñgūñ

āshiqe-e-dast-e-nigārīñ huuñ ajab kyā is kā

bhiik dariyā se agar panja-e-marjāñ māñgūñ

meve par bāġh-e-jahāñ meñ ho jo dil ko raġhbat

shajar-e-husn se maiñ seb-e-zanaḳhdāñ māñgūñ

jāma-e-jism bhī rakhne kā nahīñ dast-e-junūñ

pairahan-e-ḳhāk meñ dīvāna-e-uryāñ māñgūñ

yās-o-hirmāñ huuñ jo lohe ke chane bhī to chabā.ūñ

ne.amat-e-ishq ke qābil lab-o-dandāñ māñgūñ

miltī ho māñgne se bāġh-e-jahāñ meñ jo murād

gul se bulbul ke kafan ke liye dāmāñ māñgūñ

kab se dar par tire saa.il huuñ maiñ 'ātish' kī tarah

vo mile mujh ko jo kuchh ai shah-e-ḳhūbāñ māñgūñ

KHar matlub jo howe to gulistan mangun

bijli girne ko jo ji chahe to baran mangun

shama gul howe jo subh-e-shab-e-hijran mangun

os paDni bhi ho mauquf jo yaran mangun

KHak mein bhi jo milun main to kisi sahra mein

tum se miTTi bhi na ai gabr o musalman mangun

baKHt-e-wazhun ne zaban ko ye asar baKHsha hai

talKHi-e-marg maza de jo namakdan mangun

KHana-e-dil mein karun dagh-e-mohabbat ko talab

raushni ke liye is ghar ke jo mehman mangun

padshahi se faqiri ka hai paya baala

boriya chhoD ke kya taKHt-e-sulaiman mangun

ranj se ishq ke hai raht-e-duniya bad-tar

zaKHm-e-KHandan hun agar main gul-e-KHandan mangun

de diya kijiye saudai tumhaara hun miyan

sunghne ko jo kabhi zulf-e-pareshan mangun

aashiqe-e-dast-e-nigarin hun ajab kya is ka

bhik dariya se agar panja-e-marjaan mangun

mewe par bagh-e-jahan mein ho jo dil ko raghbat

shajar-e-husn se main seb-e-zanaKHdan mangun

jama-e-jism bhi rakhne ka nahin dast-e-junun

pairahan-e-KHak mein diwana-e-uryan mangun

yas-o-hirman hun jo lohe ke chane bhi to chabaun

neamat-e-ishq ke qabil lab-o-dandan mangun

milti ho mangne se bagh-e-jahan mein jo murad

gul se bulbul ke kafan ke liye daman mangun

kab se dar par tere sail hun main 'atish' ki tarah

wo mile mujh ko jo kuchh ai shah-e-KHuban mangun