KHabar kuchh aisi uDai kisi ne ganw mein

ḳhabar kuchh aisī uḌaa.ī kisī ne gaañv meñ

udaas phirte haiñ ham bairiyoñ kī chhāñv meñ

nazar nazar se nikaltī hai dard kī Tīseñ

qadam qadam pe vo kāñTe chubhe haiñ paañv meñ

har ek samt se uḌ uḌ ke ret aatī hai

abhī hai zor vahī dasht kī havāoñ meñ

ġhamoñ kī bhiiḌ meñ ummīd kā vo aalam hai

ki jaise ek saḳhī ho ka.ī gadāoñ meñ

abhī hai gosh bar-āvāz ghar kā sannāTā

abhī koshish hai baḌī duur kī sadāoñ meñ

chale to haiñ kisī aahaT kā aasrā le kar

bhaTak na jaa.eñ kahīñ ajnabī fazāoñ meñ

dhuāñ dhuāñ sī hai khetoñ kī chāñdnī 'bāqī'

ki aag shahr kī ab aa ga.ī hai gaañv meñ

KHabar kuchh aisi uDai kisi ne ganw mein

udas phirte hain hum bairiyon ki chhanw mein

nazar nazar se nikalti hai dard ki Tisen

qadam qadam pe wo kanTe chubhe hain panw mein

har ek samt se uD uD ke ret aati hai

abhi hai zor wahi dasht ki hawaon mein

ghamon ki bhiD mein ummid ka wo aalam hai

ki jaise ek saKHi ho kai gadaon mein

abhi hai gosh bar-awaz ghar ka sannaTa

abhi koshish hai baDi dur ki sadaon mein

chale to hain kisi aahaT ka aasra le kar

bhaTak na jaen kahin ajnabi fazaon mein

dhuan dhuan si hai kheton ki chandni 'baqi'

ki aag shahr ki ab aa gai hai ganw mein