khaDa na sun ke sada meri ek yar raha

khaḌā na sun ke sadā merī ek yaar rahā

maiñ rah-ravān-e-adam ko bahut pukār rahā

qafas se chhoḌe hai ab mujh ko kyā tū ai sayyād

chaman ke biich kahāñ mausam-e-bahār rahā

pas-az-vafāt bhī apnī huiiñ na āñkheñ band

zi-bas ki tere hī aane kā intizār rahā

ḳhudā ke vāste ab is se haath uThā ki mire

jigar meñ nam nahīñ ai chashm-e-ashk-bār rahā

huā tū ġhair se jab ham-kanār mere saath

kahāñ vo vā'da rahā aur kahāñ qarār rahā

karūñ jo chaak garebāñ ko apne huuñ majbūr

ki mere haath meñ merā na iḳhtiyār rahā

na sair-e-lāla-o-gul ham ko kuchh nazar aa.ī

ki nok-e-har-mizha par yaañ dil-e-figār rahā

galī meñ us kī ga.e aur vahāñ se phir aa.e

tamām 'umr yahī apnā kārobār rahā

ġhazal ik aur bhī ai 'mus.hafī' sunā de tū

koī kahe na ki banda umīd-vār rahā

khaDa na sun ke sada meri ek yar raha

main rah-rawan-e-adam ko bahut pukar raha

qafas se chhoDe hai ab mujh ko kya tu ai sayyaad

chaman ke bich kahan mausam-e-bahaar raha

pas-az-wafat bhi apni huin na aankhen band

zi-bas ki tere hi aane ka intizar raha

KHuda ke waste ab is se hath uTha ki mere

jigar mein nam nahin ai chashm-e-ashk-bar raha

hua tu ghair se jab ham-kanar mere sath

kahan wo wa'da raha aur kahan qarar raha

karun jo chaak gareban ko apne hun majbur

ki mere hath mein mera na iKHtiyar raha

na sair-e-lala-o-gul hum ko kuchh nazar aai

ki nok-e-har-mizha par yan dil-e-figar raha

gali mein us ki gae aur wahan se phir aae

tamam 'umr yahi apna karobar raha

ghazal ek aur bhi ai 'mushafi' suna de tu

koi kahe na ki banda umid-war raha