KHair laya to junun diwar se dar ki taraf

ḳhair laayā to junūñ dīvār se dar kī taraf

ab nazar jaane lagī bāhar se andar kī taraf

kashtī-e-ummīd ke har bādbāñ uḌne lage

kis ne ruḳh moḌā havāoñ kā samundar kī taraf

yuuñ bhī hotā hai madārāt-e-junūñ ke shauq meñ

phuul jaise haath uTh jaate haiñ patthar kī taraf

ham ne samjhe the ki ye hogā ma.āl-e-kār-e-ishq

ruḳh kiyā bād-e-bahārī ne mire ghar kī taraf

dī hai 'nayyar' mujh ko saaqī ne ye kaisī ḳhaas mai

sab kī nazreñ uTh rahī haiñ mere sāġhar kī taraf

KHair laya to junun diwar se dar ki taraf

ab nazar jaane lagi bahar se andar ki taraf

kashti-e-ummid ke har baadban uDne lage

kis ne ruKH moDa hawaon ka samundar ki taraf

yun bhi hota hai madaraat-e-junun ke shauq mein

phul jaise hath uTh jate hain patthar ki taraf

hum ne samjhe the ki ye hoga maal-e-kar-e-ishq

ruKH kiya baad-e-bahaari ne mere ghar ki taraf

di hai 'nayyar' mujh ko saqi ne ye kaisi KHas mai

sab ki nazren uTh rahi hain mere saghar ki taraf