KHala-e-fikr ka ehsas arz-e-fan se mila

ḳhalā-e-fikr kā ehsās arz-e-fan se milā

barahnagī meñ nayā lutf pairahan se milā

qadam qadam pe uge zaḳhm-e-ārzū bhī hazār

hazār rañg-e-tamāshā bhī is chaman se milā

baḌhā ke haath kahīñ uljhaneñ hī chhīn na leñ

vo jaam bhī jo mujhe shām-e-anjuman se milā

sahar ko be-khilī kaliyoñ meñ DhūñDhtī hai kiran

jo lutf-e-jalva lajā.ī huī dulhan se milā

usī ke sog meñ baiThā huā huuñ muddat se

jo ek zaḳhm rafīqān-e-ham-vatan se milā

ġhurū-e-ḳhush-nazarī nāzish-e-aqīda-o-rañg

hazār rog usī zom-e-mā-o-man se milā

hujūm-e-yās meñ tahzīb-e-nafs kā āhañg

tirī hī narm-ḳhirāmī ke bāñkpan se milā

vo hausla jo na.ī raah kī talāsh meñ hai

galī galī meñ bhaTaktī huī kiran se milā

har ek haal meñ jiine kā jagmagāne kā shauq

añdherī shab meñ sitāroñ kī anjuman se milā

ishāra fikr ko mahmez hashr-parvar kā

ḳhatā muaaf ho tere hī bāñkpan se milā

ab is shu.ūr ko mahsūr-e-zāt kaise karūñ

shu.ūr zaat ki 'zaidī' baḌe jatan se milā

KHala-e-fikr ka ehsas arz-e-fan se mila

barahnagi mein naya lutf pairahan se mila

qadam qadam pe uge zaKHm-e-arzu bhi hazar

hazar rang-e-tamasha bhi is chaman se mila

baDha ke hath kahin uljhanen hi chhin na len

wo jam bhi jo mujhe sham-e-anjuman se mila

sahar ko be-khili kaliyon mein DhunDhti hai kiran

jo lutf-e-jalwa lajai hui dulhan se mila

usi ke sog mein baiTha hua hun muddat se

jo ek zaKHm rafiqan-e-ham-watan se mila

ghuru-e-KHush-nazari nazish-e-aqida-o-rang

hazar rog usi zom-e-ma-o-man se mila

hujum-e-yas mein tahzib-e-nafs ka aahang

teri hi narm-KHirami ke bankpan se mila

wo hausla jo nai rah ki talash mein hai

gali gali mein bhaTakti hui kiran se mila

har ek haal mein jine ka jagmagane ka shauq

andheri shab mein sitaron ki anjuman se mila

ishaara fikr ko mahmez hashr-parwar ka

KHata muaf ho tere hi bankpan se mila

ab is shuur ko mahsur-e-zat kaise karun

shuur zat ki 'zaidi' baDe jatan se mila