KHala ke dasht mein ye turfa majra bhi hai

ḳhalā ke dasht meñ ye turfa mājrā bhī hai

vo āsmān jo sar par thā zer-e-pā bhī hai

havā ke dosh pe ik surma.ī lakīr ke saath

mirī talāsh meñ shāyad mirī sadā bhī hai

Darā huuñ yuuñ kabhī tanhā.iyoñ kī aahaT se

ki jaise mujh meñ koī shai mire sivā bhī hai

bahut aziiz hai mujh ko ye barg-e-nau jis meñ

zamīñ kā husn bhī hai shoḳhī-e-sabā bhī hai

mirī jafā-talabī kā ḳhayāl hai us ko

vagarna pyaar kā andāz dūsrā bhī hai

rag-e-hayāt meñ raqsāñ mirī tavānā.ī

maiñ kaise maan luuñ mere liye fanā bhī hai

KHala ke dasht mein ye turfa majra bhi hai

wo aasman jo sar par tha zer-e-pa bhi hai

hawa ke dosh pe ek surmai lakir ke sath

meri talash mein shayad meri sada bhi hai

Dara hun yun kabhi tanhaiyon ki aahaT se

ki jaise mujh mein koi shai mere siwa bhi hai

bahut aziz hai mujh ko ye barg-e-nau jis mein

zamin ka husn bhi hai shoKHi-e-saba bhi hai

meri jafa-talabi ka KHayal hai us ko

wagarna pyar ka andaz dusra bhi hai

rag-e-hayat mein raqsan meri tawanai

main kaise man lun mere liye fana bhi hai